أغلب صفحات نتايج شركات السيو بتعرض رسومات صاعدة من غير مصدر. الصفحة دي مختلفة: كل رقم فيها متاخد من Google Search Console بتاع الموقع نفسه، ومقارن بين آخر تسعين يوم والتسعين اللي قبلهم مباشرة. مفيش متوسطات ولا نسب مجمّعة، وكل حالة مكتوب فيها الموقف قبل والموقف بعد.
الأسماء مش مذكورة لأن اتفاقاتنا مع العملاء مابتتضمنش إذن تسويقي، والنتايج قابلة للتحقق لأي حد بيفكر يتعامل معانا، بنوريه لقطات الحساب في اجتماع.
متجر سماعات طبية
المتجر كان ظاهر على اسمه بس، ومفيش أي ظهور على المنتجات اللي بيبيعها. اشتغلنا على صفحات المنتجات والأسعار، وعلى العبارات اللي المشتري بيكتبها فعلاً وهو بيقارن قبل الشرا، مش المصطلحات الطبية اللي المتجر كان مستخدمها.
النتيجة في تسعين يوم: من تسعة وتلاتين نقرة لألف ومئتين وأربعة وخمسين. الظهور من ألف ومئة وسبعين لسبعة وتلاتين ألف وتسعمئة وتلاتة وأربعين. والمتجر دلوقتي في المركز الرابع على أكتر عبارة بتجيب مشترين في مجاله، وفي المركز السادس على عبارة الأسعار.
متجر موبايلات وإكسسوارات
ده أصعب مجال في السيو لأن المنافسة عليه من متاجر ضخمة بميزانيات مفتوحة. الطريقة كانت إننا ماننافسش على الأسماء العامة، ونبني بدلها صفحة لكل موديل بسعره ومواصفاته، لأن المشتري بيكتب اسم الموديل والسعة والرام مش اسم الماركة لوحدها.
النتيجة: من مئة وواحد وخمسين نقرة لألف وتلتمية وأربعة وأربعين، والظهور من ستة آلاف وسبعمية وواحد وسبعين لستة وتسعين ألف وتلتمية وتلاتين. المتجر بقى في المراكز الخمسة الأولى على عبارات أسعار موديلات بعينها.
شركة أنظمة أمن وشبكات
شركة بتبيع لشركات تانية، والقرار عندها بياخد وقت وبيعدي على أكتر من شخص. المشكلة كانت إن كل الخدمات في صفحة واحدة، فمحدش بيوصل لخدمة بعينها. فصلنا كل خدمة في صفحة تجاوب سؤالها وتشرح نطاقها.
النتيجة: من مئة وعشرين نقرة لأربعمية وتمانية وستين، والشركة دلوقتي في المركز السادس على العبارة الرئيسية في تخصصها، وفي المراكز الخمسة الأولى على عبارات الخدمات الفرعية.
محتاج تنفّذ ده لنشاطك؟ كلّمنا ونرجعلك بعرض سعر خلال ساعات.
وكالة تسويق
موقع بدأ من الصفر تماماً، صفر نقرة وصفر ظهور. الشغل كان محتوى بيجاوب أسئلة حقيقية بيدور عليها ناس في المجال، مش صفحات بتتكلم عن الوكالة.
النتيجة في أقل من تسعين يوم: تلتمية وإحدى عشرة نقرة وستة وعشرين ألف وخمسمية وأربعة وستين ظهور، ومراكز في أول عشرة على عبارات تعليمية بتجيب جمهور بيتحول بعدين.
إيه اللي الأرقام دي مابتقولهوش
النقرات مش نتيجة في حد ذاتها. النتيجة هي المكالمات والرسايل والطلبات، ودي بتعتمد على الموقع نفسه بعد ما الزائر يوصل: سرعته، ووضوح صفحاته، وسهولة إنه يتواصل معاك. أي شركة سيو بتوريك زيارات وبتسكت عن اللي بيحصل بعدها بتوريك نص الصورة.
وكمان الأرقام دي مالهاش علاقة بضمان. النتيجة بتختلف باختلاف المجال والمنافسة وحالة الموقع، والحالات اللي فوق دي مش وعد بتكرارها. اللي بيتكرر هو الطريقة مش الرقم.
إزاي تتأكد بنفسك
لو بتفكر تتعامل مع أي شركة سيو، اطلب منها حاجتين: لقطة من Search Console بتاع عميل فعلي بتاريخ واضح، وتفسير للي حصل مش الرقم بس. اللي عنده نتايج حقيقية مايتضايقش من الطلب ده.
ابعتلنا رابط موقعك وهنبعتلك اللي لقيناه فيه: السرعة على الجوال، وبنية الصفحات، والعبارات اللي المفروض تكون ظاهر عليها وانت مش ظاهر.
